Jul 24, 2026 12:55 pm

*శ్రీమహావిష్ణువు యోగనిద్ర లోకి వెళ్ళేది ఈ రోజునుంచే* 

*25 న తొలిఏకాదశి,  చాతుర్మాస్య దీక్ష ప్రారంభం ఈరోజే. . .*

(DNS  Report: *శాయిరామ్ CVS, राष्ट्रवादी पत्रकार,)*

*విశాఖపట్నం, జులై  24, 2026 (డిఎన్ఎస్):* ఏ మంచిపని ప్రారంభించినా దశమి ఏకాదశులకోసం ఎదురుచూడటం ప్రజలకు అలవాటు. ఏడాది లో వచ్ఛే 24 ఏకాదశుల్లో, ఆషాఢ శుక్ల ఏకాదశి తొలి ఏకాదశిగా పరిగణిస్తారు. దీనికే శయన ఏకాదశి అని పేరు. 

సనాతన సంప్రదాయం లో  చాతుర్మాస్య వ్రతం ఆషాఢ శుద్ధ ఏకాదశి నాడు మొదలవుతుంది. 

మన భారత దేశంలో ఉత్తరాయణం కంటే దక్షిణాయనంలోనే పండుగలు, వ్రతాలు ఎక్కువ. సూర్యుడు దక్షిణం వైపు ప్రయాణం సాగించటంతో, వర్షాలు, శీతాకాలం అన్నీ దక్షిణాయనంలోనే వస్తాయి. బ్రహ్మ వైవర్త పురాణం ప్రకారం “చాతుర్మాస్య దీక్ష” వ్రతానికి ప్రారంభదినం తొలి ఏకాదశి. 
ఈ రోజు నుంచి ప్రత్యక్ష నారాయణుడు సూర్యుడు దక్షిణం వైపుకు మరలుతాడు. అపుడే దక్షిణాయన పర్వం ప్రారంభమౌతుంది. దీనినే ఆషాఢ ఏకాదశి, ప్రథమ ఏకాదశి, పద్మ ఏకాదశి అని కూడా అంటారు. ఈనాటి నుంచే శ్రీ మహావిష్ణువు నాలుగు నెలల పాటు క్షీరాబ్ధిలో యోగనిద్రా ధ్యానంలో ఉంటాడని పురాణాలు చెప్తున్నాయి. 
అందుకే “శయన ఏకాదశి” అని కూడా అంటారు. నాలుగు నెలల తర్వాత కార్తిక శుద్ధ ఏకాదశి నాడు, అనగా ఉత్థాన ఏకాదశి నాడు మేల్కొంటాడని పురాణాలు చెబుతాయి. 
తొలి ఏకాదశి మొదలుకుని నాలుగు మాసాలపాటు యతీశ్వరులు, సాధువులు, మతాచార్యులు ఒకే చోట ఉండి, దైవ పూజాదికాలు ఆచరిస్తూ ప్రజలకు పురాణాలు, దైవ కార్యాలు విపులంగా చెబుతూ మానవులకు దైవత్వాన్ని వివరిస్తారు.  
మహావిష్ణువు విగ్రహాన్ని ఆభరణాలతో అలంకరించి, జాజిపూలతో పూజించి, పవళింపుసేవ మొదలైన సేవలతో పాటు నిత్య సంకీర్తనలతో స్వామిని సేవిస్తారు. 
మహారాష్ట్రలో వర్కారీల యాత్ర తొలి ఏకాదశి రోజున, చంద్రభాగానదీ తీరాన ఉన్న పండరీపురం పాండురంగని ఆలయం వద్ద ముగుస్తుంది. సమస్త వైష్ణవాలయాలలో, మఠాలలో, భజన కీర్తనలతో గొప్ప ఉత్సవాలు నిర్వహిస్తారు. 
తెలుగు నేలలో “ఏరు ముందా, ఏకాదశి ముందా..?” అనే సామెత తొలి ఏకాదశి గురించి చెప్పబడుతుంది. నదులకు కొత్త నీరు రావడం వల్ల రైతులు “ఏరువాక” పనులు ప్రారంభిస్తారు. సంవత్సరమంతా అతివృష్టి, అనావృష్టి, ఎటువంటి ప్రకృతి వైపరీత్యాలు లేకుండా, పంటలు బాగా పండాలని ప్రార్థిస్తారు. మాంధాత రాజు కాలంలో ఆయన రాజ్యంలో.. మూడు సంవత్సరాలు వర్షాలు లేక ప్రజలు క్షామంతో బాధపడుతుంటే, అంగీరస మహాముని వరుణుడి కటాక్షం కోసం, తొలి ఏకాదశి రోజున శ్రీమహావిష్ణువుని పూజించమని చెప్పగా, మహారాజు ఆ విధంగా చేయగానే, వర్షాలు విస్తారంగా కురిసాయి. 

ముర - ఏకాదశి వృత్తాంతం:
పూర్వం మురాసురుడనే రాక్షసుడు మునులను, మానవులందరినీ వేధిస్తుండగా, ఋషులు బ్రహ్మని ఆశ్రయించారు. బ్రహ్మ ఋషులను తీసుకుని శ్రీ మహావిష్ణువు వద్దకు వెళ్ళి మురాసురుడిని వధించి మానవాళిని కాపాడమని అర్ధిస్తాడు. విష్ణువు మురాసురునితో వెయ్యేళ్ళు యుద్ధం చేసి అలసి ఒక గుహలో యోగనిద్రలో పరమేశ్వరిని ధ్యానం చేస్తుండగా, విష్ణువు శరీరం నుంచి ఏకాదశి అనే కన్య ఉద్భవించి, మురాసురుని వధలో విష్ణుమూర్తికి తోడ్పడుతుంది. ఇదంతా ఏకాదశి నాడు జరగడంవల్ల  “ఏకాదశి నాడు నీవు అందరిచేత పూజింపబడతావని ” విష్ణువు వరమిస్తాడు. ప్రతి మాసంలో శుక్లపక్షం మరియు కృష్ణపక్షాలలో రెండు సార్లు ఏకాదశి వస్తుంది.  కోట్లాదిమంది భక్తులు ఉపవాసముండి ఏకాదశి వ్రతం చేస్తారు.
ఈ కారణంచేత పవిత్రమైన ఆషాఢ శుద్ధ ఏకాదశి పండుగను భక్తులు నియమనిష్టలతో జరుపుకుంటారు. ఉదయమే లేచి, శ్రీమహావిష్ణువుని శ్రీమహాలక్ష్మిని పూజించి, విష్ణు సహస్రనామాలు, అష్టోత్తరాలు జపించి, రామాయణ భాగవతాలు పఠించి, గోవిందనామ కీర్తనలు పాడుకుని, ఉపవాసం ఉండి, ఆ రాత్రి జాగరణ చేసి, మర్నాడు దైవదర్శనం చేసుకుని, నైవేద్యం సమర్పించుకుని అప్పుడు భుజిస్తారు. జొన్నపేలాలను బెల్లంతో కలిపి చేసే పేలప్పిండిని నైవేద్యశీగా సమర్పించి, ప్రసాదంగా స్వీకరిస్తారు. భక్తులు అన్నదానాలు చేస్తారు. తొలి ఏకాదశి పండుగ భక్తి శ్రద్ధలతో చేసుకున్నవారికి వైకుంఠ ప్రాప్తి కలుగుతుందని పురాణాలు చేపుతున్నాయి. “ఓం నమో భగవతే వాసుదేవాయ” అనే పవిత్ర మంత్రంతో భక్తులు శ్రీ మహావిష్ణువును ధ్యానిస్తారు. 

ఏకాదశి వ్రతంలోని నియమాలు - ఫలితాలు : 
ఈ ఏకాదశి వ్రతాన్ని ఆచరించదచిన వారు . . . : దశమి నాడు రాత్రి నిహారులై ఉండి ఏకాదశి నాడు సూర్యోదయానికి ముందుగా కాల కృత్యాలు తీర్చుకుని శ్రీహరిని పూజించాలి.  ఆ రోజు మొత్తం ఉపవాసం ఉండాలి.  అసత్య మాడరాదు.  స్త్రీ సాంగత్యం పనికి రాదు.  కాని పనులు, దుష్ట ఆలోచనలు చేయకూడదు.  ఆ రోజు రాత్రంతా జాగరణ చేయాలి. మర్నాడు అనగా ద్వాదశినాడు ఉదయాన్నే కాలకృత్యాదుల అనంతరం శ్రీహరిని పూజించి నైవేద్య తాంబూలాలు సమర్పించి భోజనం చేయాలి.  అన్నదానం చేయడం చాలా మంచిది.

ఉపవాస దీక్షకు గల కారణాలు : 
“విష్ణువు వరం వలన అన్నంలో దాగిన పాప పురుషుడే గాక, బ్రహ్మ పాద భాగము నుంచి క్రిందబడిన చెమట బిందువు రాక్షసుడిగా అవతరించి నివాసమునకు చోటీయమని అడిగినప్పుడు, బ్రహ్మ ఏకాదశినాడు భుజించు వారి అన్నములో నివసించమని వరమీయడంతో ఈ ఇద్దరు రాక్షసులు ఆ రోజు అన్నంలో నిండి ఉంటారు గనుక ఉదరములో చేరి క్రిముగా మారి అనారోగ్యం క్రుంగుతుందన్న హెచ్చరిక” మన పురాణాలు పరోక్షంగా వెల్లడిస్తున్నాయి. అందువలన ముఖ్యంగా ఉపవసించాలని చెప్పారు. 

సైన్సు పరంగా: . . .
సైన్సు పరంగా మరికొన్ని సూచనలు తెలుసుకుందాం. అందుకే వారి వారి వయసును బట్టి పళ్ళు పాపహారము తీసుకొనవచ్చును (అన్నం తప్ప). అంతే గాక అనేక ఆరోగ్య రహస్యము ఇమిడి ఉంటాయి.  “ లంకణం పరమౌషధం” అని ఆయుర్వేద శాస్త్రం చెబుతోంది. ఉపవాసం వలన జీర్ణ కోశము పరిశుద్ధ మౌతాయి. ఇంద్రియ నిగ్రహాన్ని కలిగిస్తుంది. మనస్సునీ, శరీరాన్నీ పరిశుద్ధం చేస్తుంది. ఈ విధంగా సైన్సు పరంగానూ, పౌరాణికంగానూ అనేక ఫలితానిస్తుందని పురాణేతిహాసాలు ఘోషిస్తున్నాయి.
ఈ వ్రతం చేసుకున్నవారికి సూర్య చంద్ర గ్రహణములో భూరి దానాలిచ్చినంత, అశ్వమేధ యాగం చేసినంత, అరవై వేల సంవత్సరాలు తపస్సు చేసినంత పుణ్యం లభిస్తుందని ఏకాదశి వ్రత మహత్యాన్ని గురించి మన పురాణాలు వివరిస్తున్నాయి 
 

Jul 23, 2026 5:51 pm

*శ్రీరామ హృదయం తో గ్రామస్థాయి నుంచి సనాతనధర్మ ప్రచారం* 

*జగదాచార్యులు చిన్న జీయర్ స్వామి సప్తతి వేడుకలకు ధార్మిక ఏర్పాట్లు*

*తెలుగు రాష్ట్రాల్లో అహోబిల జీయర్ స్వామి సుడిగాలి పర్యటనలు* 

(DNS  Report: *శాయిరామ్ CVS, राष्ट्रवादी पत्रकार,)*

విశాఖపట్నం, జులై  23, 2026 (డిఎన్ఎస్): సనాతన ధర్మం పై జరుగుతున్న వ్యతిరేక కార్యక్రమాల ను సమర్ధవంతంగా నిలువరించేందుకు పరమపూజ్య  త్రిదండి అహోబిల జీయర్ స్వామి షాక్ ట్రీట్మెంట్  సిద్ధం చేసారు. 

పరమహంస పరివ్రాజకులు, జగదాచార్యులు, అపరరామానుజులు త్రిదండి చిన్న జీయర్ స్వామి వారి సప్తతి మహోత్సవ వేడుకల్లో భాగంగా భారీ ఎత్తున ధార్మిక కార్యక్రమాలకు శ్రీకారం చుట్టారు. ఈ వేడుకల గురించి భక్తులకు తెలియచేసేందుకు పరమపూజ్య  త్రిదండి అహోబిల జీయర్ స్వామి వారు రెండు తెలుగు రాష్ట్రాల్లో సుడిగాలి పర్యటనలు చేస్తున్నారు. శ్రీకాకుళం జిల్లా నుంచి ఆదిలాబాద్ వరకూ అవిశ్రాంతంగా పర్యటిస్తూ. . భక్తులతో సమావేశాలు నిర్వహిస్తున్నారు. 
ఈ సందర్బంగా ఈ మహోన్నత భక్తి ఉద్యమ ప్రక్రియ ను అహోబిల జీయర్ స్వామి  DNS Media కు వివరించారు. 

విశిష్టాద్వైత సంప్రదాయ వైభవాన్ని దేశ విదేశాల్లో విస్తృత పరిచిన చిన్న జీయర్ స్వామి వారు ఈ ఏడాది దీపావళి నాటికి 70 వ తిరునక్షత్రం లోకి ( జన్మదినం) అడుగుపెడుతున్న సందర్బంగా ఈ వేడుకలను ధార్మిక పరంగా నిర్వహిస్తున్నట్టు తెలిపారు. 
అపరరామానుజులకు శిష్య, ప్రశిష్యులు, భక్తులు  అందించే గురు వైభవం ఈ శ్రీరామ హృదయం యాత్ర  అని తెలియచేస్తున్నారు. ఈ వేడుకలను పురస్కరించుకుని సనాతన సంప్రదాయాన్ని అన్ని గ్రామాల్లో మరింతగా విస్తరింపచేయడం కోసం శ్రీరామ హృదయం కార్యక్రమాన్ని చేపట్టినట్టు స్వామిజి తెలియచేసారు. 

శ్రీవైష్ణవ కుటుంబాల సభ్యులు, శ్రీవైష్ణవ దేవాలయాల అర్చక, అర్చకేతర సిబ్బంది, సమాశ్రయణం పొందిన భక్తులు, సనాతన ధర్మం పై గౌరవం ఉన్న ధార్మికులు అందరితోనూ సమావేశాలు నిర్వహిస్తున్నారు. ఈ సందర్భంగా ఇచ్చాపురం నుంచి ఆదిలాబాద్ వరకూ అవిశ్రాంతంగా  పర్యటిస్తూ వరుస సమావేశాలు నిర్వహిస్తున్నట్టు తెలిపారు.  శ్రీవైష్ణవ సంఘాలు,  చిన్న జీయర్ స్వామి వారి సేవ సంస్థల సభ్యులు, భక్తులతో సమావేశం జరిపి కార్యక్రమాన్ని వివరించడం జరుగుతోందన్నారు.  

ఈ సప్తతి వేడుకల్లో ప్రధానంగా నిర్వహించే కార్యక్రమాలు ఇవే: 

1 . ప్రతీ గ్రామం లోనూ సత్సంగం :

ఆషాడ పౌర్ణమి నుండి ఆశ్వయుజ పౌర్ణమి వరకు ప్రతీ గ్రామం లోనూ తొంభై ఇళ్లల్లో సత్సంగాలు నిర్వహించాలి. 
ప్రతి గ్రామం లోనూ ప్రతి రోజూ సాయంత్రం ఒక భక్తుని ఇంట్లో సత్సంగం నిర్వహించాలి. 
ఈ సత్సంగం లో  జీయర్ స్వామి వారు పాడిన  శ్రీ విష్ణు సహస్రనామ స్తోత్ర పారాయణ  ఆడియో పెడతారు. వారి స్వరం అనుకరిస్తూ మనం కూడా శ్రీ విష్ణు సహస్రనామ స్తోత్ర పారాయణ జరగాలి. 
పారాయణ అయిన తరువాత మన సంప్రదాయ వైశిష్ట్యాన్ని రోజుకో అంశం చొప్పున ఆయా గోష్ఠులలో  తెలియజేయాలి.  సనాతన ధర్మం ప్రచారం కోసం మంచిమాటలు చెప్పుకోవాలి. 
ఈ గోష్టిలో పాల్గొన్న వారి వివరాలు సేకరించాలి.  చిన్న జీయర్ స్వామి వారి సప్తతి ఉత్సవాలకు  జిల్లా, మండల, గ్రామ స్ధాయిలలో వీరు చేపట్టగలిగిన బాధ్యతలను అందించాలి. 

శ్రీరామ హృదయ యాత్ర : 

జగదాచార్యులు త్రిదండి చిన్న జీయర్ స్వామి వారి ఆరాధ్య దైవం శ్రీరామచంద్రుడు. ఈ సందర్భంగా శ్రీ రామహృదయ యాత్ర మర్యాదా పురుషోత్తముడు శ్రీరాముడి పేరిట ప్రతీ గ్రామం లోనూ తిరువీధి ఉత్సవాలు నిర్వహించాలి. 
చిన్న జీయర్ స్వామి వారి ఆశ్రమం  దివ్య సాకేతం  నుంచి  ప్రతీ మండలానికి ఒక శ్రీరామహృదయ కలశ పంపుతారు.  ఆ కలశం మన గ్రామానికి వచ్చినప్పుడు మన గ్రామ భక్తులందరిలో అవకాశం ఉన్న ప్రతి ఒక్కరు పాల్గొనాలి.  ఆ కలశాన్ని ఊరేగింపుగా ప్రతి ఇంటికి తీసుకువెళ్లి వారిచే ఆ పవిత్ర కలశాన్ని రామమంత్రంతో ఆ ఇంట్లోని వారితో తాకేలా చేసి, దానిలో వారికి తోచినంత బియ్యం వేయించడం చేయాలి. 
అలా వచ్చిన బియ్యాన్ని ఆ గ్రామంలోని ఒక దేవాలయానికి ఇవ్వాలి. ఇలా రోజుకి రెండు గ్రామాలలో ఆ కలశం తిరగాలి.

నిర్వహణ కమిటీ లు:

శ్రీ రామహృదయ యాత్ర, పారాయణ, ధర్మ ప్రచారం నిర్వహించడం కోసం, జిల్లా స్థాయి,  మండల స్థాయి , గ్రామ స్ధాయిల్లో ఒక కమిటీ ని ఏర్పాటు చేయడం జరుగుతుంది. ఈ కమిటీ ల్లో శ్రీవైష్ణవ కుటుంబాల సభ్యులు, చిన్న జీయర్ స్వామివారి సేవా సంస్థ వికాస తరంగిణి సభ్యులు ఉంటారు. వీరందరూ సమన్వయంతో ముందుకు తీసుకువెళ్లాలి.

ప్రధాన లక్ష్యం: -  

ప్రస్తుతం సనాతన ధర్మం పై జరుగుతున్న భౌతిక దాడులు,  సామాజిక మాధ్యమాల్లో వెలుగుచూస్తున్న విపరీత ట్రోలింగ్ లు, హిందూ వ్యతిరేక కార్యక్రమాల ను సమర్ధవంతంగా నిలువరించేందుకు జరుగుతోంది. 

ఈ మహా కార్యక్రమం సనాతన హిందూ ధార్మిక భక్తులను అందరిని  ఒక వేదికమీదకు తీసుకురావడం కోసం‌ నిర్వహిస్తున్నారు. 

సంప్రదించగలరు: -

చిన్న జీయర్ స్వామి వారి సప్తతి ఉత్సవాల్లో సేవా కార్యక్రమాల్లో పాల్గొనేందుకు ఆసక్తి ఉన్న వారు  అఖిల భారత శ్రీవైష్ణవ బ్రాహ్మణ సంక్షేమ సంఘం జాతీయ ప్రధాన కార్యదర్శి  శ్రీమాన్ యతిరాజుల బాల బాలాజీ  స్వామిని  ఫోన్ నెంబర్ 6303691109 లో  సంప్రదించవచ్చును. 

Jul 15, 2026 8:05 pm

*పూరి క్షేత్రంలో ప్రసాదమే అత్యంత ప్రాధాన్యం.* 

(DNS  Report: *శాయిరామ్ CVS, राष्ट्रवादी पत्रकार,)*

*విశాఖపట్నం, జులై  15 , 2026 (డిఎన్ఎస్):* పూరి జగన్నాధునికి ప్రతి రోజూ  ఛప్పన్ ( 56 ) భోగాల నిత్య నైవేద్యాలు ఆరగింపు చేస్తారు. వాటి వైభోగం వర్ణనా తీతం. పూరీ ఆలయంలోని నైవేద్యాలను సిద్ధం చేసే భోగమంటపం (వంటశాల) లో కూడా ప్రత్యేకతలు చాలానే ఉన్నాయి. 

జగన్నాథునికి ఛప్పన్ (56) ప్రసాదాలను, రోజుకు ఆరుసార్లు నివేదిస్తారు. జగన్నాథునికి నివేదన పూర్తయిన తర్వాత క్షేత్రపా లిక అయిన విమలాదేవికి నివేదించి, ఆ ప్రసాదాలను ఆలయ ఈశాన్యభాగాన ఉండే 'ఆనంద బజార్' లో భక్తులకు విక్రయిస్తారు. 
ప్రసాదాలను వండటానికి ఎప్పటికప్పుడు కొత్త మట్టి కుండలనే ఉపయోగిస్తారు. కట్టెల పొయ్యిలపై వండు తారు. భోగ మంటపానికి చేరువలోని 'గంగ', 'యమున' అనే రెండు బావుల్లోని నీటిని మాత్రమే వంటకాలకు ఉపయోగిస్తారు. ప్రతిరోజూ ఏకకాలంలో యాభై వేల మందికి సరిపోయేలా ఇక్కడ ప్రసాదాలను తయారు చేస్తారు. 
పర్వదినాల్లో  నైతే లక్షమందికి సరిపోయేలా తయారు చేస్తారు. ఏకకాలంలో లక్షమంది కూర్చుని  భోజనం చేయగలిగేంత విశాలమైన భోజనశాల ఇక్కడి ప్రత్యేకత. 
జగన్నాథునికి నివేదించే ప్రసాదాలను 'మహాప్రసాదం'గా పరిగణిస్తారు. మహాప్రసాదాన్ని ఆర గిస్తే మనోభీష్టాలు సిద్ధిస్తాయని భక్తుల విశ్వాసం. 

పూరీలో నివేదించే ఛప్పన్ భోగాలేమిటంటే... 1. అన్నం 2. కనికా ( బియ్యం , నెయ్యి, పంచదారతో తయారు చేస్తారు) 3. దొహి పొఖాహ్ (నీట్లో నానిన అన్నానికి పెరుగు కలిపి తయారు చేస్తారు) 4. ఒద్దా పొఖాళా ( నీట్లో నానిన అన్నానికి అల్లం కలుపుతారు)  5. తీపి కిచిడీ (బియ్యం , పెసరపప్పు, నెయ్యి, పంచదారతో చేస్తారు) 6. నేతి అన్నం 7. కిచిడీ 8. మిఠా పొఖాళి (నీట్లో నానిన అన్నానికి పంచదార కలుపుతారు).  9. ఒరియా పొఖాళి (బియ్యం, నెయ్యి, నిమ్మరసం, ఉప్పుతో చేస్తారు) 10. కాజా  11. గొజ్జా (గోధుమపిండి, నెయ్యి, పంచదారతో చేసే మిఠాయి)  12. లడ్డు  13. మగజా లడ్డు ( గోధుమపిండితో చేసే లడ్డు) 14. జీరా లడ్డు  (గోధుమ పిండికి జీలకర్ర చేర్చి తయారు చేసే లడ్డు) 15. వల్లభ (గోధుమపిండితో చేసే ఒక ప్రత్యేక మిఠాయి) 16. ఖురుమా (గోధుమపిండి, పంచదార, ఉప్పుతో చేస్తారు) 17. మొథాపులి (మినుములు, నెయ్యి, పంచదారతో చేస్తారు)  18. కకరా (గోధుమపిండి, కొబ్బరికోరు, పంచదారతో చేస్తారు)  19. మరిచి లడ్డు (గోధుమపిండి, నెయ్యితో చేస్తారు)  20. లుణి ఖురుమా (గోధుమపిండి, నెయ్యి, ఉప్పుతో చేస్తారు) 21. సువార్ పిఠా (గోధుమపిండి, నెయ్యితో చేస్తారు) 22. జొడెయి లొడా (గోధుమలు, నెయ్యి, పంచదారతో చేస్తారు) 23. యిలి (వరిపిండి, నెయ్యి, పంచదారతో చేస్తారు) 24. కొంటి (వరిపిండి, నెయ్యితో చేస్తారు) 25. మండా (గోధుమపిండి, నెయ్యితో చేస్తారు) 26. ఒమాళు (గోధుమపిండి, నెయ్యి, పంచదారతో చేస్తారు) 27. పూరీ  28. లుచి (వరిపిండి, నెయ్యితో చేస్తారు)  29. బొరా (మినప్పప్పుతో చేసే వడలు)  30. దొహిబొరా (పెరుగు గారెలు) 31. అరిసె  32. త్రిపురి (వరిపిండి, నెయ్యితో చేస్తారు)  33. రోసాపాయిక (గోధుమలతో చేస్తారు)  34. ఖిరి (పాయసం) 35. పాపుడి (పాలమీగడ, పంచదారతో చేస్తారు)  36. కోవా  37. రొసాబొళి (పాలు, పంచదార, గోధుమలతో చేస్తారు)  38. తడియా (తాజా పనీర్, నెయ్యి, పంచదారతో చేస్తారు) 39. ఛెనాభాయి (తాజా పనీర్, పంచదార, పాలతో చేస్తారు) 40. బపుడి ఖోజా (పాలమీగడ, నెయ్యి, పంచదారతో చేస్తారు) 41. ఖువా మండా (పాలు, గోధుమపిండి, నెయ్యితో చేస్తారు) 42. సొరాపులి (పాలను గంటల తరబడి మరిగించి చేసే మిఠాయి) 43. డల్లి (కందిపప్పుతో చేసే ముద్దపప్పు) 44. ముగోడల్లి (పెసరపప్పు వంటకం)  45. బిరిడల్లి (మినుములతో చేసే పప్పు) 46. ఉరద్ డల్లి (మినప్పప్పు వంటకం) 47. దాం (కందిపప్పు, కాయగూరలు కలిపి చేసే వంటకం) 48. మవుర్ (పప్పులు, కొర్రలతో చేసే వంటకం) 49. బేసొరొ (కలగూర వంటకం) 50. సగో (తోటకూర వంటకం) 51. పొటోలో రొసా (పొటల్స్/పర్వల్ కూర) 52. గోటి బైగొణా (గుత్తివంకాయ కూర) 53. ఖోటా (చింతపండు గుజ్జు, బెల్లంతో చేసే లేహ్యం) 54. రైతా (పెరుగులో కూరగాయల ముక్కలు వేసి చేస్తారు) 55. పిఠా (గోధుమపిండితో చేసే తీపిరొట్టె) 56. బైగని (వంకాయలతో చేసే వంటకం)...