*పెద్ద జీయర్ స్వామి చూపిన మార్గమే నేటి వైభవం*  

*(DNS రిపోర్ట్ :  సాయిరాం CVS ,  బ్యూరో చీఫ్, విశాఖపట్నం)*  

*విశాఖపట్నం, నవంబర్ 30, 2020  (డి ఎన్ ఎస్):* విశిష్టాద్వైత సంప్రదాయంలో జీయర్ సంప్రదాయం ద్వారా ఆధ్యాత్మిక వైభవాన్ని పతాకస్థాయి కి తీసుకు వెళ్లిన వారు పెద్ద జీయర్ స్వామి అని ప్రముఖ ఆధ్యాత్మికవేత్త

త్రిదండి చిన్న జీయర్ స్వామి తెలియచేసారు. సోమవారం విశాఖ బీచ్ రోడ్ మంగమారి పేటలోని వారిజ ఆశ్రమంలో జరుగుతున్న శ్రీరామాయణ క్రతు మహాయజ్ఞం లో ఆయన పాల్గొన్నారు.  ఈ సందర్బంగా భక్తులను ఉద్దేశించి మాట్లాడుతూ 1960 లో తమిళనాడులోని ఒక హేతువాది చెన్నపట్నం వీధుల్లో శ్రీరామాయణ పుస్తకాలకు జరిపిన అవమానానికి ప్రాయశ్చిత్తంగా

పెద్ద జీయర్ స్వామి దేశ వ్యాప్తంగా 108 శ్రీరామాయణ క్రతువులను నిర్వహించారన్నారు. ఆ మహోన్నత కార్యక్రమం మొదలు పెట్టి 60 ఏళ్ళు పూర్తి అయినా సందర్బంగా ప్రతి రోజు ఉదయం వేలాది మంది భక్తులచే  శ్రీరామాయణ పారాయణ కార్యక్రమం నిర్వహిస్తున్నామన్నారు. జీయర్ వేదపాఠశాలలోను, వివిధ ఆలయాల్లోనూ నిత్యం రామాయణ హవనం జరుగుతోందని

తెలిపారు. దానిలో భాగంగా విశాఖ సాగర తీరంలోని వారిజ ఆశ్రమం లో సోమవారం శ్రీరామాయణ మరియు సుదర్శన హోమ పూర్ణాహుతి లో పాల్గొన్నామన్నారు. 

ఇదే ప్రాంగణం లో విద్యార్థులు, భక్తుల కోసం నిర్మించిన తళిహశాల (వంటశాల) ను స్వామిజి ప్రారంభించారు. కార్తీక పౌర్ణమి ప్రాశస్త్యాన్ని వివరించారు. 

అనంతరం భక్తులకు

పూర్ణాహుతి ప్రసాదం అందించారు. ఈ కార్యక్రమం లో వారిజ వేదపాఠశాల అధ్యాపకులు శ్రీకాంత్ స్వామి, ఇతర సభ్యులు పాల్గొన్నారు.