*అభాగ్య కౌలురైతు కుటుంభానికి ఆవును అందించిన రైతు స్వరాజ్య వేదిక* 

*(DNS Report: Sairam CVS, राष्ट्रवादी पत्रकार,)*

*అనకాపల్లి / విశాఖపట్నం, మే 25, 2024 (డి ఎన్ ఎస్):* సమాజానికి ఆహారం అందిస్తున్న రైతుల జీవితాలను పరిరక్షించుకోవాల్సిన భాద్యత ప్రతి ఒక్కరి పై ఉందని రైతు స్వరాజ్య వేదిక రాష్ట్ర కో కన్వీనర్ గాడి బాలు

తెలిపారు. అప్పుల బాధ తీరక అకాలమరణం చెందిన అనకాపల్లి జిల్లా కశింకోట గ్రామానికి చెందిన కౌలురైతు పొలమరశెట్టి జగ్గారావు (42), కుటుంబానికి సహకారం అందించేందుకు వచ్చిన ఆయన రైతుల జీవన విధానం పై ఆవేదన వ్యక్తం చేసారు. ఈ సందర్బంగా మాట్లాడుతూ రైతులకు, ముఖ్యంగా కౌలు రైతులకు ప్రభుత్వ సహకారం అందించని కారణంగా అప్పుల బాధ తీరక అకాల

మరణానికి పాల్పడుతున్నారని అన్నారు. 
వ్యవసాయ పెట్టుబడులకు చేసిన అప్పుల కారణంగా జూన్ 28 న జగ్గారావు ఆత్మహత్య చేసుకున్నారు. ఇంతవరకు ఆ కుటుంబానికి ప్రభుత్వం నుండి అందాల్సిన ఆర్థిక సహకారం అందకపోవడం, స్థానిక అధికార యంత్రాంగం నేటి వరకు ఎటువంటి చర్యలు లేకపోవడం చాల బాధాకరం అన్నారు. ప్రభుత్వం నుంచి ఎటువంటి సహాయం అందక,

అప్పుల వారి ఒత్తిడి తట్టుకోలేక మనోవేదన పడుతున్న జగ్గారావు భార్య పొలమరశెట్టి పార్వతికి ఒక పాడి ఆవును కొనుగోలు చేసి బాలు శనివారం అందజేశారు. ఈ కార్యక్రమం లో బాలుతో పాటు విభిన్న ప్రతిభావంతుల సంక్షేమ సంఘం వ్యవస్థాపక అధ్యక్షులు పాత్రపల్లి వీరు యాదవ్ పాల్గొన్నారు. 

ప్రభుత్వ యంత్రాంగం మేలుకొని ఆత్మహత్య

చేసుకున్న రైతు కుటుంబాల పట్ల దృష్టి సారించాలని, ప్రభుత్వం అందించే ఏడు లక్షల రూపాయల ఆర్థిక సహాయాన్ని అందజేయాలని యాదవ్ కోరారు.